झापा, चैत १२ । ललितपुरको ढोलाहिटीमा गएराति दुई समूहबीच होलीको निहुँमा झडप हुँदा दुईजनाको मृत्यु भएको छ। प्रहरीका अनुसार झडपका क्रममा छुरी प्रहारबाट दुईजनाको ज्यान गएको हो।
धरान घर भई ढोलाहिटी बस्ने रोवस राई र पाँचथर घर भई खुमलटार बस्ने पूजन राईको मृत्यु भएको जिल्ला प्रहरी परिसर ललितपुरका सूचना अधिकारी एसपी नरेश सुवेदीले जानकारी दिए।
घटना राति १० बजेपछिको हो। एसपी सुवेदीका अनुसार राति ११ बजेतिर एकजनालाई सुमेरु र एकजनालाई पाटन अस्पताल लगिएपछि प्रहरीले घटनाबारे जानकारी पाएको हो। अस्पताल पु¥याउनेबित्तिकै चिकित्सकले दुवैलाई मृत घोषणा गरेका थिए।
प्रहरीले घटनास्थलबाट एकथान छुरी र एउटा छुरीको बिँड बरामद गरेको छ। घटनामा संलग्न भएको आशंकामा प्रहरीले केहीलाई नियन्त्रणमा लिएको छ।
होली मनाएर पौडी खेल्न गएका तीन बालबालिका बेपत्ता
होली मनाएर नदीमा पौडी खेल्न गएका तीनजना बालबालिका आइतबार बेपत्ता भएका छन्। सुनकोसी नदीमा पौडी खेल्न गएका उदयपुरको त्रियुगा नगरपालिका वडा नम्बर १४ साउनेका तीनजना बालबालिका बेपत्ता भएका हुन्।जिल्ला प्रहरी कार्यालय उदयपुरका प्रहरी उपरीक्षक रमेश थापाका अनुसार साउनेका ८ वर्षीय चोलकचन्द्र मगर, ७ वर्षीय रिदम मगर र ११ वर्षीया रेखा मगर बेपत्ता भएका हुन्।
होली मनाएर साउनेको धाप्लाङघाटस्थित पौडी खेल्न गएका उनीहरू डुबेर बेपत्ता भएको प्रहरी उपरीक्षक थापा बताए।उनीहरूसँगै पौडी खेल्न गएका अन्य ४ बालबालिकालाई स्थानीयले सुनकोसीबाट उद्धार गरेको उनले बताए ।बेपत्ता भएका बालबालिकाहरूको खोजी तीव्र पारिएको एसपी थापाले जानकारी दिएका छन्।