दमक ,२१ असोज । बिर्तामोड भेट्रानले दमकमा सञ्चालित कोशी प्रदेश जिल्ला स्तरीय प्रथम भेट्रान च्यालेन्ज कप–२०८३ को उपाधि जितेको छ।दमक–२ स्थित बेलडाँगी खेलमैदानमा बिहीबार सम्पन्न फाइनल खेलमा बिर्तामोड भेट्रानले दमक भेट्रान रातोलाई २–० गोल अन्तरले पराजित गर्दै उपाधि आफ्नो पक्षमा पारेको हो।
उपाधि संगै बिर्तामोड भेट्रानले रु १ लाख १ हजार नगदसहित ट्रफी, मेडल र प्रमाणपत्र प्राप्त गरेको छ। यस्तै, उपविजेता बनेको दमक भेट्रान रातोले रु ५१ हजार नगदसहित ट्रफी, मेडल र प्रमाणपत्र प्राप्त गरेको छ।
खेल सुरु भएको १७औँ मिनेटमा बिर्तामोड भेट्रानका जर्सी नम्बर ७ का खेलाडी प्रवेश कटुवालले गोल गर्दै टोलीलाई सुरुआती अग्रता दिलाएका थिए। त्यसपछि २८औँ मिनेटमा बिर्तामोड भेट्रानकै जर्सी नम्बर ५ का खेलाडी रविन राईले थप एक गोल गर्दै टोलीको अग्रता दोब्बर बनाएका थिए।
खेलको पहिलो हाफमा बिर्तामोड भेट्रानले गरेको दुई गोल नै टोलीका लागि निर्णायक बन्न पुगेको थियो । खेलको क्रममा दमक भेट्रानका दुई खेलाडीले पहेँलो कार्ड पाएका थिए।
प्रतियोगितामा उत्कृष्ट गोलकिपरको उपाधि तीर्थ रिजाल,उत्कृष्ट डिफेन्डरमा मोहन गुरुङ ,उत्कृष्ट मिडफिल्डरमा भूपेन लिम्बू घोषित भए। खेलमा उत्कृष्ट प्रदर्शन गर्दै ‘म्यान अफ द म्याच’को उपाधि प्रवीण राईले प्राप्त गरे । प्रतियोगिताभर उत्कृष्ट प्रदर्शन गर्ने खेलाडीका रूपमा दमक रातोका तुलबहादुर मगर ‘म्यान अफ द सिरिज’ बन्न सफल भए। उनीहरुलाई ट्रफी तथा सम्मान प्रदान गरिएको थियो।
फाइनल खेलको पूर्वसन्ध्यामा आयोजित मैत्रीपूर्ण खेल जनप्रतिनिधि र पत्रकारबीच सम्पन्न भएको थियो। खेलमा जनप्रतिनिधिको टोलीले पत्रकारको टोलीलाई २–१ गोल अन्तरले पराजित गरेको थियो ।खेल सुरु हुनुअघि पूर्व खेलाडीहरूलाई सम्मान गरिएको थियो।
दमक भेट्रान फुटबल क्लबका अध्यक्ष गजेन्द्र देवानको अध्यक्षतामा प्रतियोगितामा कोशी प्रदेशका विभिन्न जिल्लाका एक दर्जन भेट्रान टोलीहरूको सहभागिता रहेको आयोजकले जनाएको छ। प्रतियोगिता गत असोज १५ गतेदेखि शुरु भएको थियो ।