पथरी,२० जेठ । पथरीमा सम्पन्न प्रथम कञ्चनजंघा क्रिकेट प्रतियोगिताको उपाधि आयोजक कञ्चनजंघा दैवी प्रकोप व्यवस्थापन समितिले जितेको छ। मंगलबार सम्पन्न रोमाञ्चक फाइनल खेलमा आयोजक टिमले डाँस मोरङ्गी क्लबलाई ४ विकेटले पराजित गर्दै उपाधि हात पारेको हो।
टस हारेर पहिले ब्याटिङ गरेको डाँस मोरङी क्लबले १८ ओभर ३ बलमा सबै विकेट गुमाउँदै १सय २१ रनको मध्यम लक्ष्य प्रस्तुत गरेको थियो। डाँस मोरङ्गीका लागि उमर सानीले सर्वाधिक ३२ रन बनाए भने रोहित राजवंशीले २२, प्रदीप मण्डलले १७ र दीपेश सुवेदीले १६ रनको योगदान दिए।
बलिङतर्फ आयोजक टिमका सुरज न्यौपानेले ३ विकेट लिए भने मोहम्मद निशार र ज्ञानेन्द्र श्रेष्ठले समान २र२ विकेट तथा अभि लिम्बू र नितेश साहनीले १र१ विकेट लिए।
१२२ रनको लक्ष्य आयोजक टिमले १९ ओभर १ बलमा ६ विकेटको क्षतिमा पूरा गर्यो। जितमा सोनु मण्डलको ३६ रन, विजय घिमिरेको २९ रन र सुरज न्यौपानेको १७ रन महत्वपूर्ण रहे। डाँसका आर। के। मण्डलले ३ विकेट र प्रदीप मण्डलले २ विकेट लिए।
व्यक्तिगत विधामा पनि आयोजक टिमको वर्चस्व रहेको थियो। उक्त प्रतियोगिताको उत्कृष्ट खेलाडी आयोजक टिमका सुरज न्यौपाने घोषित भए। उत्कृष्ट ब्याट्स म्यानको उपाधि सोनु मण्डलले पाउँदा, उत्कृष्ट बलर डाँसका उमर सानी घोषित भए। उदयीमान खेलाडीको रुपमा पथरीशनिश्चरे क्रिकेट क्लबका अभिषेक बिक चयन भए।
विजेता टिमले नगद ५५ हजार ५ सय ५५ रुपैयाँसहित ट्रफी प्राप्त गर्यो भने उपविजेताले ३३ हजार ३ सय ३३ रुपैयाँ पुरस्कार पायो। विजेता तथा उपविजेता टिमलाई पथरी शनिश्चरे नगरपालिका वडा नं। १० का अध्यक्ष जीवन खतिवडासहितका विशिष्ट अतिथिहरूले पुरस्कार वितरण गरेका थिए।
मौसमको कारण आइतबार तय गरिएको फाइनल खेल मंगलबार सम्पन्न गरिएको हो। प्रतियोगितामा कुल १६ टिमको सहभागिता रहेको थियो।