झापा,१६ माघ । विराटनगरस्थित नोबेल शिक्षण अस्पतालका सञ्चालक एवम समाजसेवी डा.सुनिल शर्माले झापाको विर्तामोड–१० स्थित सहयोगी समाजलाई एम्बुलेन्स प्रदान गरेका छन् । डा.शर्माले नोबेल अस्पतालको तर्फबाट करिब १२ लाख मूल्य पर्ने एम्बुलेन्स निःशुल्क प्रदान गरेका हुन् ।
विर्तामोडमा शनिबार एक कार्यक्रमकाबीच डा.शर्माले नोबेल अस्पतालको तर्फबाट करिब १२ लाख मूल्य पर्ने एम्बुलेन्स निःशुल्क प्रदान गरेका हुन् ।
कार्यक्रममा नोबेल अस्पतालका प्रवन्धक नारायण दाहालले समाजका अध्यक्ष नविन विमलीलाई एम्बुलेन्सको चावी हस्तान्तरण गरे । कार्यक्रममा प्रदेश सभा सदस्य ओम सरावगी, सहयोगी समाजका अध्यक्ष एवं नेपाली कांग्रेस झापाका सचिव विमली, विर्तामोड–१० का वडाध्यक्ष दुर्योधन गुरुङ्ग लगायतले एम्बुलेन्स प्रदान गरेर सहयोग पुरयाँएको भन्दै डा.शर्माको सेवा भाव कार्यको प्रशंसा गरे ।
२०७६ असोज ६ गते नेपाली कांग्रेस क्षेत्र नं ३ ले कांग्रेसको राष्ट्रिय जागरण अभियानका क्रममा डा.शर्माले सो क्षेत्रलाई निःशुल्क एम्बुलेन्स प्रदान गर्ने घोषणा गरेका थिए । सोही घोषणा अनुरुप एम्बुलेन्स प्रदान गरिएको हो । यो एम्बुलेन्सले अब सो क्षेत्रका विरामीहरुलाई सहुलियत दरमा सेवा प्रदान गर्ने बताइएको छ ।
डा.शर्माले झापामा प्रदान गरेको यो दोस्रो एम्बुलेन्स हो । यसअघि उनले बुद्धशान्ति गाउँपालिका–३ स्थित महिला सामुदायिक अस्पताललाई पनि एम्बुलेन्स दिएका थिए । समाजसेवाका क्षेत्रमा बेग्लै पहिचान बनाएका उनले यसअघि पूर्वी पहाडी जिल्ला पाँचथर र कर्णालीको विकट जिल्ला कालिकोटमा पनि एम्बुलेन्स प्रदान गरेका छन् । त्यस्तै, उनले मोरङको पथरीशनिश्चरे, इटहरा, सुन्दरहरैंचा लगायत क्षेत्रमा पनि निःशुल्क एम्बुलेन्स दिएका छन् ।