दमक,९ चैत । दमक १० का कुखुरापालक किसान देवेन्द्र प्रसाइँको लेयर्स फार्ममा रहेका कुखुरामा बर्ड फ्लू देखिएपछि जनमानसमा उत्पन्न त्रासलाई मध्यनजर गर्दै दमक लेयर्स कुखुरा पालन समूहले सोमबार सरोकारवालाहरुसँग छलफल गरेको छ ।
झापा जिल्ला अण्डा उत्पादक संघका अध्यक्ष समेत रहेका व्यवसायी भरतकुमार चम्लागाइँको अगुवाईमा जुम बैठक मार्फत सरोकारवालाहरुले सो बिषयमा छलफल गरेका हुन् ।
अन्तरक्रिया सहितको बैठकमा कुखुराको उपचार तथा यस सम्बन्धिको खोज अनुसन्धानमा २० बर्ष अघिदेखि कार्यरत प्राध्यापक डा. सुविर सिंहले अहिले पूर्व क्षेत्रमा पालिएका कुखुराहरुमा देखिएको फ्लू (एच ५, एन १ ) नामक फ्लू भएको बताए । उनले यसका बिषयमा विभिन्न माध्यमबाट प्रकाशन प्रशारण भइरहेका सामग्रीहरु तथ्य पूर्ण र वैज्ञानिक खोज अनुसन्धानबाट प्रमाणित किसिमका हुन आवश्यक रहेको सुझाए । यो भाइरस लागेका कुखुरा वा अण्डा ६० डिग्री भन्दा माथिको तापक्रममा पकाउँदा स्वतः नष्ट हुने तथ्य विज्ञानले प्रमाणित गरिसकेको अवस्थामा यसबारे धेरै नकारात्मक प्रचार प्रसार आवश्यक नरहेको डा. सिंहको तर्क छ ।
पोल्ट्री व्यवसायी संघका केन्द्रिय अध्यक्ष विनोद पोखरेलले सबै पशुपंक्षी र मानिसहरुमा समेत अलग अलग यस्ता भाइरसहरु हुने तर कुखुरामा लाग्ने यो भाइरसका बिषयमा भने धेरैनै आतकंपूर्ण रुपमा फैलाइँदा यसको प्रत्यक्ष अप्रत्यक्ष असर सामान्य किसान र व्यवसायी तथा लगानीकर्ताहरुमा पर्न गइरहेको प्रति सजग हुनुपर्ने जोड दिए । उनका अनुसार देशभरि पोल्ट्री व्यवसायमा प्रत्यक्ष करिब २० लाख मानिस आबद्ध रहेका छन् ।
दमक नगरपालिकाकी उपप्रमुख रेगिना भट्टराई (प्रसाइँ)ले बर्ड फ्लू मानव स्वास्थ्यसँग समेत जोडिएको बिषय भएकाले स्थानीय सरकारका तर्फबाट अपनाउनु पर्ने सजगता र सतर्कताका लागि सम्बन्धित निकायहरुसँग समन्वय गरिरहेको जानकारी दिईन् । उनले बर्डफ्लूको संक्रमण कुखुराबाट मानिसमा सहजै सर्न नसक्ने तर्क सम्बन्धित विज्ञहरुले गरिरहेकाले आम नागरिकहरु यसबाट अत्तालिनु पर्ने अवस्था नरहेको तर आफ्नो स्वास्थ्यका बिषयमा संवेदनशील हुनु स्वभाविक भएको उल्लेख गरिन् ।
अन्तरक्रियामा दमकका अगुवा पोल्ट्री ब्यवसायी माधव पराजुलीले कुखुरामा देखिएको फ्लुको गलत प्रचारका कारण समग्र पोल्ट्री ब्यवसाय जोखिममा परेको गुनासो गरे । उनले सामान्य किसान र व्यवसायमा असर पार्ने किसिमका नकारात्मक सन्देशहरुका कारण ठुलो आर्थिक नोक्सानी भइरहेको प्रति सजग हुनुपर्ने औंल्याए । उनले विश्वमा देखिने बर्डफ्लूलाई अन्य देशमा स्वभाविक रुपमा लिएर यसको निदान गर्ने गरिएको भए पनि नेपालमा यसलाई ठुलो चर्चाको बिषय बनाइने गरेको टिप्पणी गरे ।
छलफलमा कुखुरामा देखिएको बर्डफ्लूका कारण पीडित व्यवसायी प्रसाइँले चैत ३ गते केही कुखुरा एक्कासी मरेका र ल्याब परीक्षणका लागि पठाउँदा बड्फ्र्लू पुष्टि भएको जानकारी दिए ।
यसपटक अचानक देखिएको फ्लूका कारण आफ्नो व्यवसायमा झण्डै रु तीन करोड रुपियाँको नोक्सानी ब्यहोर्नु परेको उनको भनाई थियो । उनका अनुसार फार्ममा २० हजार कुखुरा मध्ये ९ हजार जति मरिसकेको छ । उनले निकै लामो समयपछि यस्तो फ्लु देखिएकाले थप संक्रमण फैलिन नदिन सवैको सहयोग खाँचो रहेको उल्लेख गरे ।
झापाको दमक-१० स्थित दमक एग्रिकल्चर फार्म र झापा गाउँपालिका –७ मा रहेको सुदिक्षा कृषि फार्ममा बर्डफ्लु देखिएको थियो ।