दमक,२ पुस । दमक र गौरीगञ्जमा शुद्ध पिउने पानीका लागि भन्दै वडाले वितरण गरेका बायोस्याण्ड फिल्टरको गुणस्तरका बिषयमा बायोस्याण्ड फिल्टर उत्पादनकर्ताहरुको साझा संस्थाले नै प्रश्न उब्जाएको छ ।
बायोस्याण्ड फिल्टर उद्यमी संगठन नेपालको केन्द्रीय समितिले शनिबार दमकमा पत्रकार भेटघाटको आयोजना गर्दै अघिल्ला दुई आर्थिक बर्षमा उदयपुर बायोस्याण्ड फिल्टर उद्योगका सञ्चालक सन्तोषकुमार रेग्मीले दमकका दुई वटा र गौरीगञ्जको एउटा वडामा वडाले शुद्ध पिउने पानी उपलब्ध गराउन भन्दै वितरण गरेको फिल्टरको गुणस्तरनै मापदण्ड अनुसारको नभएको जिकिर गरेको हो ।
संगठनका केन्द्रीय अध्यक्ष इश्वरी प्रसाद दाहालले गौरीगञ्जको २ नम्बर, दमकको २ नम्बर र १० नम्बर वडाले वितरण गरेका सयौं फिल्टर गुणस्तरहीन र मापदण्ड विपरित रहेको जिकिर गरे । अहिलेसम्म खानेपानीको फिल्टर गुणस्तर प्रमाणित गर्ने व्यवस्था राज्यका निकायबाट हुन नसकेको बताउँदै अध्यक्ष दाहालले उद्यमीहरुको साझा संगठनले केही मापदण्डहरु तय गरेर उपभोक्ताहरुलाई सुसूचित गरिरहेको जानकारी दिए । उनले संगठनले तय गरेका मापदण्डहरुको उल्लंघन गर्दै मोरङको रतुवामाईमा सञ्चालित एक उद्योगले ति वडाहरुमा उपलब्ध गराएका कतिपय फिल्टर उपयोग गर्न अयोग्य र गुणस्तरहीन रहेको अनुगमनका क्रममा भेटिएको पनि सो संगठनले जनाएको छ ।
अनुगमनमा त्रुटीपूर्ण देखिएका फिल्टर समेत सेटिङका भरमा वडाका कर्मचारीहरुले खरिद गरेर उपभोक्तालाई वितरण गरि स्वास्थ्यमाथिनै खेलबाँड गरिरहेको प्रति संगठनको गंभीर ध्यानाकर्षण भएको पनि अध्यक्ष दाहालले उल्लेख गरे ।
पत्रकार सम्मेलनमा वितरित प्रेस विज्ञप्तीमा वितरण गरिएका फिल्टरको मेडियाको गुणस्तर नरहेको, पानी र बालुवाको सतह नमिलेको, फिल्टर चर्किएको र पानी चुहिएको, फिल्टर उपयोग सम्बन्धी उपभोक्तालाई कुनै पनि ज्ञान नदिएको अनुगमनका क्रममा पाइएको पनि उल्लेख छ । पत्रकार सम्मेलनमा संगठनका केन्द्रीय सदस्य कमल प्रसाद बाँस्कोटा, एक नम्बर शाखा प्रमुख दिपक भण्डारी,शाखा सदस्य युवराज सिग्देल, व्यवस्थापक कृष्णबहादुर भुजेलसहित उद्यमी नेतृत्वको उपस्थिति रहेको थियो ।